Fréttir

Á haustönn 2026 verður boðið upp á nám í pípulögnum og rafvirkjun í FSu sem kennt verður á kvöldtíma ef næg þátttaka fæst. Námið er aðallega hugsað fyrir þá einstaklinga sem hafa ekki komist að í dagskóla fram til þessa eða hafa áhuga en hafa ekki getað verið í námi á dagtíma.

Áfangamessa er fastur liður í starfsemi FSu. Þá setja kennarar skólans upp skreytta bása eða kynningarborð á sal skólans og nemendur kynna sér fjölbreytt námsframboð. Á þessari önn varð sá dagur MIÐVIKUDAGURINN 4. MARS. Valdagur fylgir svo í kjölfarið og verður 11. MARS næstkomandi en þá velja nemendur áfanga fyrir komandi haustönn.

Dagana 24. til 28. febrúar síðastliðinn fór Kór Fjölbrautaskóla Suðurlands í söngferð til Ítalíu. Flogið var til Mílanó og þaðan ekið til borgarinnar Ölbu. Tilgangurinn var að hitta ítalska jafnaldra sem voru að setja upp ameríska söngleikinn Chorus Line.

Vikuna 2. - 6. mars er hinsegin vika í FSu. Fögnum fjölbreytileikanum og klæðumst öllum regnbogans litum.

Myndlistarnemar við Fjölbrautaskóla Suðurlands hafa sett upp sýningu í Sundhöll Selfoss sem ber yfirskriftina Möndlað með mannslíkamann en þar er LÍKAMINN helsta viðfangsefnið. Myndlistaráfanginn er á 3. þrepi og aðeins kenndur fjórðu hverja önn. Hann kallast Maður og efni og er einn af framhaldsáföngum myndlistarkennslunnar.

FSu tekur núna þátt í alþjóðlegu þróunarverkefni sem snýr að brotthvarfi nemenda úr námi og hagnýtingu gervigreindar til að draga úr því brotthvarfi. Háskóli Íslands leiðir þessa vinnu og óskaði eftir aðkomu FSu. Heiðurskonan Halla Dröfn Jónsdóttir skólafélagsráðgjafi FSu var fulltrúi skólans á vinnufundi í Brussel í liðinni viku. Verkefnið kallast stAI en fyrri hluti hugtaksins vísar til nemenda (student) en seinni hlutinn til gervigreindar (AI).

Forvarnarverkefnið Öruggara Suðurland varð til á stofnfundi í Þorlákshöfn 18. apríl árið 2024. Í því er lögð áhersla á að vinna að forvörnum og afbrotavörnum á breiðum samfélagsgrunni þar sem opinberar stofnanir og félagasamtök taka höndum saman. Í þeim efnum leikur fyrirbærið samfélagslöggan jákvætt og uppbyggilegt hlutverk og sinnir forvörnum í leikskólum, grunnskólum, framhaldsskólum og í félagsmiðstöðvum.

Nú á vordögum býður Endurmenntun græna geirans upp á nokkur námskeið ætluð fyrir fagmenntaða garðyrkjufræðinga. Athyglinni verður beint að klippingu, umhirðu og áhættumati trjágróðurs. Einnig verður námskeið um forvarnir gegn gróðureldum.

Í lok nóvember síðastliðinn var afhjúpað nýtt merki fyrir Kór Fjölbrautaskóla Suðurlands en slíkt hefur kórinn ekki átt áður. Um samkeppni var að ræða sem fram fór á milli nemenda í áfanganum NÝMI2GH05 eða grafísk hönnun þar sem snert er á ýmsum þáttum eins og letri og meðferð þess, táknmáli forma og lita, heildarframsetningu veggspjalda og bæklinga og kíkt inn í heim vörumerkja. Kennari áfangans var Ágústa Ragnarsdóttir.

Skólastarf er hafið að nýju í FSu eftir jólafrí. Nýtt ár í uppsiglingu með nýjum fyrirheitum. Skrifstofa skólans opnaði 5. janúar, starfsmannafundur og samráðsfundIr námsgreina voru haldnir degi síðar og kennsla hófst samkvæmt stundatöflu þann 8. janúar.