Umsókn um garðyrkjunám

Skráning í nám

Opið verður fyrir skráningu nýrra nema á haustönn 2026 frá 13. mars - 26. maí. Vinsamlega kynnið ykkur vel námsbrautalýsingar https://mms.is/stadfestar-namsbrautalysingar og forkröfur náms.

1. menntagatt.is með rafrænum skilríkjum
2. Velja skóla Fjölbrautaskóli Suðurlands
3. Velja braut
4. Láta námsferil fylgja með sem viðhengi (ef þú er með nám úr öðrum skóla)
5. Tilgreina í athugasemdardálki hvort sótt sé um staðnám eða fjarnám.
6. Tilgreina líka starfsreynslu í garðyrkju ef um slíkt er að ræða

Nýnemar geta ekki valið áfanga sjálfir við innritun, um þá skráningu sér Svala Sigurgeirsdóttir, deildarfulltrúi svala@fsu.is. Ef spurningar vakna er velkomið að hringja eða senda póst. Kennsluskrifstofa Garðyrkjuskólans er opin frá kl. 9-14 flesta daga. Sími: 4808170

Almennt eru nýnemar teknir inn annað hvert ár og næst byrjum við haust 2026. En mjög áhugasamir nemendur geta skráð sig í nám í einstökum áföngum á flestum önnum.

Nemandi við garðyrkjuskólann velur eina af 6 námsbrautum skólans; Blómaskreytingar, Garð- og skógarplöntur, Lífræn ræktun matjurta, Ylræktun, Skógur og náttúra eða Skrúðgarðyrkjubraut. Námið er á framhaldsskólastigi og er 120 ein bóknám og 100 ein verknám. ATH! Blómaskreytingar eru því miður ekki kenndar fyrr en mögulega haust 2026.

Fjarnám/staðnám

Ef námið er tekið á fullum hraða (staðnám) er hægt að ljúka því á 2 árum og þá er um fullt nám að ræða, full stundatafla og allir dagar og allar vikur undir upp úr miðjum ágúst til byrjun maí.

Fjarnámið virkar þannig að flestir áfangar eru í streymi og teknir upp svo nemendur geta hlustað/horft þegar þeir óska. Fjarnemar greiða 2.500 kr. fyrir hverja einingu og almennt eru fjarnemar að taka 15-17 einingar á önn svo fjareiningagjaldið yrði u.þ.b. 40.000 kr., einnig er  innritunargjald á önn 12.000 kr. fyrir alla nemendur.

Fjarnemar geta tekið námið á ½ hraða og lokið því á 4 árum. Lotuvikur eru þrjár (jafnvel fjórar) á hverri önn og er mætingarskylda fyrir alla fjarnema í þeim vikum í þá áfanga sem þeir eru skráðir í. Lotuvikur vorannar 2026 eru 5. - 9. janúar, 2. - 6. febrúar og 9. - 13. mars.  

Fjarnemar geta búist við mætingaskyldu utan skipulagðra lotuvikna í verklegar æfingar aðallega á síðustu önn námsins. Blómaskreytingar eru mikið til staðnám en boðið er uppá fjarnám í bóklegum áföngum. Staðnemar hafa skyldumætingu alla önnina og greiða ekki fjareiningagjöld.

Forkröfur

Umsækjandi þarf að vera orðinn 18 ára. Gert er ráð fyrir að umsækjandi hafi lokið 12 vikum af 60 vikna verknámi á verknámsstað sem skólinn viðurkennir, áður en bóknám hefst. Umsækjandi þarf að hafa lokið að lágmarki eftirtöldum áföngum í almennum framhaldsskóla alls 20 einingar: • Almenn efnafræði á öðru hæfniþrepi 5 ein. • Almenn líffræði á öðru hæfniþrepi 5 ein • Bókfærsla á fyrsta hæfniþrepi 5 ein • Stærðfræði á öðru hæfniþrepi 5 ein. Æskilegt er að umsækjandi hafi jafnframt lokið eftirtöldum áföngum í almennum framhaldsskóla alls 25 einingar: • Íslenska á öðru hæfniþrepi 10 ein • Enska á öðru hæfniþrepi 10 ein • Danska á öðru hæfniþrepi 5 ein. Gert er ráð fyrir að nemendur séu vel tölvufærir og hafi góð tök á námstækni. Æskilegt er að nemandi hafi gilt skyndihjálparskírteini. Nánari upplýsingar um inntökuskilyrði eru á heimasíðu skóla.

Alla jafna er heimilt að taka inn nemendur sem orðnir eru 25 ára gamlir og hafa reynslu úr viðkomandi faggrein en eru ekki með formlega menntun á framhaldsskólastigi. Þau sem ekki hafa verið í námi lengi og/eða ekki lokið framhaldsskóla geta tekið undirbúningsnámskeið til dæmis hjá Fjölbrautaskólanum við Ármúla sjá hér eða við Menntaskólann á Tröllaskaga sjá hér

Áhersla á:

Efnafræði á fyrsta eða öðru hæfniþrepi

Líffræði á fyrsta eða öðru hæfniþrepi

Stærðfræði á öðru hæfniþrepi (æskilegt fyrir skrúðgarðyrkjunema að læra vel hornaföll/rúmfræði)

Bókfærsla á fyrsta hæfniþrepi

Íslenska á fyrsta hæfniþrepi

Lánshæfni og raunfærnimat

Nám á 3 þrepi er lánshæft svo framarlega sem nemandi er í fullu námi eða að lágmarki 22 ein á önn. Þau sem hafa lengi unnið við skrúðgarðyrkju geta sótt um raunfærnimat og fengið metna kunnáttu sína bæði í bóklegum og verklegum greinum. Hafa þarf samband við Iðuna fræðslusetur sjá hér

Verknám

Æskilegt er að nemendur hafi 12 vikna reynslu af garðyrkjustörfum áður en nám hefst en hver umsókn er skoðuð fyrir sig með tilliti til fyrri starfa og aldurs. Þessar 12 vikur eru hluti af 60 vikna dagbókarskydu verknámi sem er hluti námsins. Þetta verknám fer fram hjá garðyrkjufyrirtækjum, í gróðarstöðvum, skrúðgarðafyrirtækjum o.þ.h. undir handleiðslu garðyrkjufræðings og með samþykki skólans. Verknámið er gjarnan tekið á sumrin milli anna og eftir atvikum að því loknu. Við útskrift af garðyrkjubrautum og að loknu 60 vikna verknámi útskrifast nemandinn með titilinn garðyrkjufræðingur sem skiptir höfuðmáli við störf t.d. hjá ríkisstofnunum vegna starfsréttinda og launa.

Sjá nánar um verknám skrúðgarðyrkju á Garðyrkja-verknám 

Sækja verknámseyðublað fyrir aðrar brautir en skrúðgarðyrkju á Fsu.is – námið – Garðyrkjuskólinn skjöl til niðuhals – Eyðublöð vegna verknáms – samþykki verknámsstaðar.

Eyðublaðið þarf að fylla út og senda á svala@fsu.is eða viðkomandi brautarstjóra.

Farið er fram á að nemendur garðyrkjunáms hafi bílpróf og í einstaka áföngum er krafist að nemandi sé orðin lögráða til að nota vélar og tæki.