Sértækir námsörðugleikar
Nemendur með sértæka námsörðugleika geta fengið aðstoð náms- og starfsráðgjafa við skipulagningu náms og við leit að úrræðum sem best henta hverjum og einum. Nemendum stendur einnig til boða að fara á námstækninámskeið þar sem lögð er áhersla á tímastjórnun, glósutækni, lestraraðferðir og prófundirbúning. Lesskimunarpróf er lagt fyrir nýnema skólans og ef grunur leikur á að nemendur eigi við lestrarörðugleika að etja eiga þeir kost á að fara í lesgreiningu, þeim að kostnaðarlausu. Þeir nemendur sem greinast með verulega lestrarörðugleika eða lesblindu (dyslexíu) geta fengið hljóðbækur í mörgum áföngum, í samvinnu við Hljóðbókasafn Íslands.
Tilhliðrun í prófum
Nemendur sem greindir hafa verið með sértæka námserfiðleika og telja sig þurfa á tilhliðrun að halda við próftöku skulu snúa sér til náms- og starfsráðgjafa í síðasta lagi tveimur vikum fyrir upphafstíma prófa á hverri önn. Reglurnar varðandi tilhliðrun eru eftirfarandi:
| 1. | Allir nemendur fá lengri próftíma, þannig að eins klukkustunda próf lengist í einn og hálfan tíma auk náðarkorters. |
| 2. | Nemendur eiga möguleika á að fá prófverkefni með stækkuðu letri. |
| 3. | Nemendur geta í sérstökum tilvikum fengið að taka próf á tölvu t.d. í stafsetningu. |
| 4. | Nemendur geta fengið aðstoð við upplestur prófa. Próf verða þá annað hvort lesin upp í heild sinni eða einstakar spurningar eða textar lesnir fyrir einstaklinga, eins oft og þörf krefur. Sömuleiðis er möguleiki á að fá prófið lesið inn á tölvu. |
| 5. | Í einstaka tilfellum, eftir mati kennara/fagstjóra og í samráði við sérkennara og/eða náms- og starfsráðgjafa, er veitt aðstoð við ritun prófa. |
| 6. | Þá koma munnleg próf einnig til greina fyrir þessa nemendur. |