Brottfall

Ástundun

Nemendur bera ábyrgð á eigin námi. Kennarar og annað starfsfólk eiga að styðja við nemendur og vinna markvisst að því að draga úr brottfalli úr námi. Sjá nánar í reglugerð um ábyrgð og skyldur aðila skólasamfélagsins í framhaldsskólum nr. 326/2016.

Ef nemandi mætir ekki í skólann fyrstu fimm kennsludaga annarinnar og lætur ekki vita af sér skriflega eða með tölvupósti á fsu@fsu.is er litið svo á að hann ætli ekki að stunda nám við skólann þá önn og er gerður óvirkur í Innu.

Nemendum ber að sækja allar kennslustundir samkvæmt stundaskrá eins og fram kemur í skólasóknarreglum. Forráðamenn nemenda yngri en 18 ára hafa aðgengi að INNU þar sem þau geta fylgst með mætingum og námsframvindu.

Kennarar hafa það hlutverk að fylgjast með mætingum nemenda sinna og fari nemandi ekki eftir skólareglunum, hvað þetta varðar, skulu þeir grípa inn í samkvæmt ferlinu sem hér er lýst.

1. Viðvörun

Áfangastjóri sendir nemendum og forráðamönnum reglulega yfirlit yfir ástundun í tölvupósti. Yfirlitið gildir sem áminning ef þar kemur fram að skólasókn uppfyllir ekki lágmarkskröfur.

Kennari ræðir við nemanda sinn þegar fjarvistir hafa náð u.þ.b. helmingi leyfilegra fjarvista í áfanga og leitar skýringa.

2. Nánari skýringa leita

Haldi nemandi áfram að safna fjarvistum í áfanga, þrátt fyrir viðvörun, skal kennari ganga úr skugga um hvort viðhlítandi skýring sé þar á. Í slíkum tilvikum er nauðsynlegt að spyrjast fyrir um nemandann, t.a.m. um vottorð á skrifstofu, hjá náms- og starfsráðgjafa og aðstoðarskólameistara. Umsjónarkennari hefur samband við forráðamenn nemenda undir 18 ára aldri ef tilefni er til.

3. Nemandi strikaður út úr áfanga

Fáist engin viðhlítandi skýring og að öllu ofangreindu könnuðu telst málið endanlega frágengið. Fari nemandi upp fyrir hámark leyfilegra fjarvista fyllir kennari út rafrænt eyðublað og skráir nemanda úr áfanga. Nemandinn fær falleinkunn (F). 

4. Andmælaréttur nemanda

Nemandi fær senda tilkynningu um úrsögn í tölvupósti þar sem fram kemur að hann hafi þrjá virka daga til andmæla. Andmælum skal skilað skriflega á netfangið andmaeli@fsu.is. Sjá nánar í skólasóknarreglum.

Úrsögn úr áfanga/skóla

Ef nemandi vill hætta í áfanga skal hann ræða við náms- og starfsráðgjafa um málið. Ef hann er enn ákveðinn í að hætta verður ákvörðun hans tilkynnt til áfangastjóra. Við úrsögn er tölvupóstur sendur á viðkomandi kennara og forráðamenn nemanda undir 18 ára aldri.

Ef nemandi vill hætta í skólanum skal hann ræða við náms- og starfsráðgjafa um málið. Sé nemandinn undir 18 ára aldri skal náms- og starfsráðgjafi strax hafa samband við foreldra/forráðamenn. Ef ákvörðun nemandans er endanleg skal náms- og starfsráðgjafi tilkynna úrsögnina til áfangastjóra.

Verkefnaskil, námsvandi, framkoma

Ef misbrestur verður á verkefnaskilum nemenda eða um greinilegan námsvanda er að ræða skal kennari snúa sér til náms- og starfsráðgjafa sem kallar á nemandann og leitar með honum lausna á vandanum. Ef hins vegar er um agavandamál að ræða skal kennari snúa sér til aðstoðarskólameistara sem kallar nemandann til sín og leitar með honum lausna. Finnist engin lausn á vanda nemandans eða nemandinn sýnir engan vilja til samstarfs skal hann hætta í viðkomandi áfanga. Hætti nemandinn skal kennari/aðstoðarskólameistari tilkynna það skriflega til áfangastjóra.