Þórey Hekla sigraði söngkeppni FSu 2018
Myndina tók Magnús Hlynur Hreiðarsson.
Þórey Hekla Ægisdóttir er sigurvegari söngkeppni FSu 2018, en keppnin fór fram í gærkvöld. Þórey Hekla söng lagið It´s a man´s world. Í öðru sæti var Gígja Marín Þorsteinsdóttir með lagið Turning tables og í þriðja sæti varð Kolbrún Katla Jónsdóttir með lagið I have nothing. Sérstök verðlaun voru veitt fyrir sviðsframkomu og flott atriði, en það var Hermann Snorri Hoffritz sem hreppti þau með flutningi á frumsömdu lagi. Alls tóku tíu atriði þátt í keppninni og alltaf jafn gaman að sjá hversu miklir hæfileikar finnast meðal nemenda á tónlistarsviðinu.
Keppnin var glæsileg að venju, en þetta er langstærsti viðburður á vegum nemendafélagsins á hverri haustönn. Þema kvöldsins var “Taktu flugið” og var íþróttahúsið skreytt hátt og lágt í samræmi við það.