Ljóðasamkeppni - sigurljóð
Ég nenni ekki að lesa lengur
Niðurstöður dómnefndar í ljóðasamkeppni íslenskudeildar og bókasafns FSu
Dómnefnd skipuðu: Kristín Þórarinsdóttir, Kolbrún Lilja Kolbeinsdóttir og Örlygur Karlsson.
LISTIN FAGRA
Við heiðan himin, Listin fæðist.
Yndi allra er.
Um fagra móa, Listin læðist.
Tínir fögur ber
vex úr grasi, Listin lærir.
Kynnist ungri mey.
Missir stúlku, Listin særir.
Faðir sagði nei.
Yfir sjóinn, Listin talar.
Skóla gengur í.
Drakk við barinn, Listin hjalar.
Ferðast heim á ný.
Skáldskap leggur, Listin yrkir.
Íslands verður stolt.
Fegurð spinnur, Listin virkir
landsins móa og holt.
Veikur verður, Listin kveikir,
allra manna von.
Vissuð þið að Listin heitir
Jónas Hallgrímsson.
Magnús Ágúst Magnússon
(SKÓLALJÓÐ)
Bless kæri vinur,
þú sem ég hef elskað,
þú sem ég hef hatað.
Takk fyrir árin,
þú sem hefur kennt mér,
þú sem ég hef lært af.
Nú kveð ég þig,
þú sem ég fékk nóg af,
þú býrð í mínu hjarta.
Tími til að fara
frá þér sem lést mig strita,
frá þér sem leiddir mig.
Ég mun þér aldrei gleyma,
svo lengi sem ég er.
Ég lét mig um þig dreyma,
ég endaði hjá þér.
Hér átti ég heima,
bless skóli, nú ég fer.
Vala Haux
AÐ VONA
Ekki bara vonlaust
Kannski dáið
Hér eru litlir fuglar
þrátt fyrir myrk ský
Kannski hafa trén öskrað
þegar sverðin hafa komið
Maður sem hefur kannski
sungið þegar allt var fallegt
núna tilheyrir hann jörðinni
þaðan sem hann var kominn en mun ekki endilega rísa aftur
Grasið er hvítt og blátt
en gras þarf ekki alltaf
að vera grænt
Kannski getur
þetta allt komið
til baka
Þegar maður sér
eitt lítið blóm
sem er ekki búið að drepa
og vill ekki deyja, ekki strax
Þetta litla blóm getur galdrað
og þá getur maður vonað
Gunnlaugur Bjarnason
NÁMSLEIÐI
Hvergi er friðinn að finna.
Fjandans og endalaus vinna.
Þrekið er farið,
þróttinum varið
í þreytandi skyldu að sinna.
Lærdómur liggur í stöflum.
Nei, hann liggur í hólum og sköflum!
Ég hvergi get gengið,
nú nóg hef ég fengið
af helvítis prófum og köflum.
Ég nenni ekki að lesa lengur.
Af lærdómnum kominn er strengur
í hendur og bak,
í hálsinum tak
og heimanám hreint ekkert gengur.
Iðunn Rúnarsdóttir