HEIÐURSMAÐUR Í HEIMSÓKN
Einhvern tímann sagði einhver að óvæntar heimsóknir væru skemmtilegastar. Það sannaðist mánudaginn 12. febrúar síðastliðinn þegar Heimir Pálsson fyrsti skólameistari FSu kom í stutta heimsókn í skólann ásamt Örlygi Karlssyni sem sjálfur gegndi stöðu skólameistara og aðstoðarskólameistara um langan tíma. Heimir hafði þá fyrr um daginn haldið erindi í lestrarfélagi eldri borgara á Selfossi þar sem fjallað er um Íslendingasögur. Sjálfur er Heimir norrænu- og íslenskufræðingur og hefur meðal annars samið kennslubækur um íslenska bókmenntasögu sem kenndar hafa verið við FSu. Hann gegndi síðast lektorsstöðu í norrænum fræðum við hinn aldna og rómaða Uppsalaháskóla í Svíþjóð.
Heimir stýrði skólanum á upphafsárunum frá 1981 til 1983 þegar svokölluð Hlaupabraut var hið eiginlega kennslurými eða andrúm og ekkert eiginlegt skólahúsnæði risið. Um þennan tíma segir á vefsíðu FSu: „Bæjarstjórn Selfoss tók forystu að stofnun FSu og rak hann í tvö ár. [. . .] Kennsluhúsnæði var á mörgum stöðum og hlupu nemendur á milli skólastofa. Þar kom upp nafnið Hlaupabrautin.” Í riti sínu Fjölbrautaskóli Suðurlands - Hornsteinn í héraði 1981 – 2011 segir Gylfi Þorkelsson meðal annars um þennan tíma: „Það var landnemabragur á hlaupabrautinni og mikil samstaða manna á meðal. Samþykkt teikning að glæsilegu skólahúsi lá fyrir og engan óraði fyrir öðru en nýja húsið væri handan við hornið. Skólameistarinn [Heimir] var ákafamaður, afdráttarlaus foringi sem vildi keyra hlutina áfram, hvatti sitt lið til dáða og blés því í brjóst á hlaupunum, svo engum datt í hug að draga af sér til að hlutirnir gengju sem best.” Ummælin um Heimi eru höfð eftir Ásmundi Sverri Pálssyni sem um langt árabil starfaði við FSu.
jöz.