VEL HEPPNAÐUR KYNNINGARFUNDUR

Síðdegis þann 1. september síðastliðinn var haldinn kynningarfundur á sal skólans fyrir foreldra og forsjáraðila nýnema í FSu. Afar vel heppnuð og skipulögð kynning sem ríflega 200 foreldrar sóttu og má fullyrða að þessi árlegu kynningarkvöld eru hvort tveggja í senn að sanna sig og festa sig í sessi.

Eftir opnum og ávarp skólameistara tók við kynning áfangastjóra á náms- og áfangakerfi skólans. Þá kynntu náms- og starfsráðgjafar ásamt skólafélagsráðgjafa hlutverk sitt og mikilvægi í skólastarfinu ásamt því að bjóða upp á samtal við þá foreldra sem það vildu. Formaður nemendaráðs ávarpaði samkomuna og kynnti félagsstarfið framundan og að lokum röðuðu umsjónarkennarar nýnema sig í flestar kennslustofur á annarri hæð og fóru ítarlegar í efnið og svöruðu fyrirspurnum.

Jafnhliða var boðið upp á kaffi og súkkulaðikex og mátti heyra á viðstöddum að vel og faglega hafi verið að verki staðið. Kynningarfundurinn er einn af þremur liðum í móttöku nýnema í FSu. Hinir eru nýnemadagur sem hóf hið formlega skólastarf 18. ágúst síðastliðinn og nýnemaferð sem farin verður niður í Flóa þriðjudaginn 8. september undir leiðsögn BRAGA kennara en það kallast umsjónarkennarar skólans. Heitið vísar til þess að skapa farsælan SKÓLABRAG með einkunnarorð FSu - fjölbreytni – sköpun og upplýsingu - að leiðarljósi.

jöz.