Fimleikaakademía

Aðsetur: Engjavegi 50

Kennitala:  690390-3029

Sími:  482-1505  

Póstfang: fimleikar@umfs.is

Fjöldi iðkenda:  Haust 2016:  15

Þjálfari:

Arna

Arna Hjartardóttir, sjúkraþjálfari og ÍAK styrktarþjálfari

Æfingaaðstaða:  

Æft er í fimleikasalnum í Baulu og þreksalnum í Iðu.  Tvær æfingar á viku eru tæknilegs eðlis og fara þær fram í Baulu en styrktarþjálfunin fer fram í Iðu tvisvar í viku. Aðstaðan er til fyrirmyndar á báðum stöðum og nýtist mjög vel í þjálfuninni. 

Fjöldi eininga:  Fimleikaakdaemían raðast sem valgrein og fyrir hvern áfanga fá nemendur 5 einingar fyrir. 

Hvað þýðir að vera hluti af akademíu FSu:

Það að vera hluti af fimleikaakdemíu Fsu skilar sér í auknum aga til iðkenda og gerir þá ábyrgari á sinni íþróttaþjálfun og námi.  Það að stunda nám við íþróttaakademíur FSu eru án efa góð meðmæli fyrir iðkandann þegar sótt er um í framhaldsnám og vinnu

Hvað fær iðkandinn út úr því að vera í akademíu FSu:

Í fimleikaakademíunni er mikið unnið með markmiðssetningu og leiðir að markmiðum sem gerir iðkendur meðvitaðri um þjálfunina. Markmiðsetning er mikilvæg í skóla en ekki síst í lífinu sjálfu og nemendur læra að tileinka sér markmiðssetningu í akademíunni.  Þjálfunin í akademíunni er mjög einstaklingsbundin. Unnið er með tækniatriði og fínpúss á æfingum einstaklingsmiðað sem skilar sér í betri færni í íþróttinni og þá sérstaklega í flóknari stökkum.  Nemendur hafa haft á orði að það sé gott að æfa tækniatriði úthvíldur fyrri part dags í stað þess að vera alltaf á æfingum seinni partinn og á kvöldin. Þessi punktur er mjög gildur því það er mikilvægt að vera með einbeitingu þegar tækniatriði eru æfð. Akademían gefur þeim tækifæri á að stunda tækniþjálfun fyrri partinn sem er stór plús. Styrktarþjálfun í fimleikaakademíunni er undir handleiðslu sjúkraþjálfara sem sníður styrktarþjálfunarprógram að hverjum og einum. Það gerir þjálfunina enn fjölbreyttari og markvissari en ella og er almenn ánægja með námið sem á sér stað í styrktarþjálfuninni. Akademíurnar leggja líka mikla áherslu á hollt mataræði og næringu en það er einn af stóru þáttunum sem skipta máli til að ná árangri í íþróttum.

Forsaga: Fimleikaakademían var stofnuð haustið 2008.  Nemendur hafa verið á bilinu 14-27 frá stofnun. Fyrsti strákurinn innritaðist í akademíuna 2011 og hefur þeim farið fjölgandi síðan. Olga Bjarnadóttir sá um þjálfun fimleikaakademíunar frá upphafi og allt til haustsins 2016 þegar Arna Hjartardóttir tók við. Akademían hefur skilað nemendum góðum árangri og stutt við bakið á þeim sem hafa náð inná alþjóðleg mót. 

Kynning:

{youtube}bH3WFbNE-XM&feature{/youtube}

Umsögn frá núverandi nemanda:

Rannveig Harpa Jónþórsdóttir

Það er mjög gott tækifæri fyrir íþróttamenn að geta valið sér akademíur og gert það sem þeim finnst skemmtilegast í skólanum. Akademían nýtist mér mjög vel og ég nota hana til að byggja upp stökkin sem ég er að æfa. Í akademíunni fær maður tækifæri til þess að viðhalda og bæta grunninn sinn utan æfinga og æfa tækni sem maður kemst kannski ekki yfir að æfa á æfingum. Okkur er kennt að setja okkur markmið og búa til plan til þess að ná þeim. Í fimleikum skiptir tæknin mjög miklu máli og það er mjög gott að fá auka æfingar til þess að æfa hana. Við einbeitum okkur meira að smáatriðum í akademíu en á fimileikaæfingum og það hjálpar okkur að verða betri fimleikamenn. Á æfingum er mjög góður félagskapur og mikill metnaður sem gerir það að verkum að æfingarnar eru skemmtilegar og áhrifaríkar. Í lok annar er svo mjög gaman að sjá þær bætingar sem maður hefur náð og að akademían hafi skilað árangri.

Aukaæfingin skapar meistarann!

Umsögn frá fyrrverandi nemanda:

Unnur Þórisdóttir nemi í sjúkraþjálfun og fyrrverandi nemandi í Fimleikaakademíu FSu

Ég var svo lánsöm að fá að vera meðlimur Fimleikaaademíu FSu fyrstu 4 starfsárin og útskrifaðist vorið 2012.  Á þessum tíma þróaðist akademían úr því að vera frábær í að verða rosalega frábær!

Að mínu mati voru öll vinnubrögð til fyrirmyndar svo sem fagleg uppbygging, samsetning bóklegra og verklegra æfinga, innsýn í næringarfræði, þjálffræði og auðvitað fimleikaþjálfunin sjálf sem var viðbót við stífar æfingar í meistaraflokki Umf. Selfoss.

Þótt það bætist við æfingaálagið, þá var akademian þannig uppbyggð að maður fékk aldrei nóg. Þetta var aldrei yfirþyrmandi mikið, ekki af minni hálfu allavega en auðvitað bættust við æfingar og það kom alltaf tími þar sem maður var þreyttur.  Þá þurfti bara að fara fyrr að sofa og hugsa betur um bæði sál og líkama.

Á mótatímabili var mjög gott að fá aukaæfingar í akademíunni þar sem hægt var að einbeita sér betur að stökkunum ásamt því að fá að æfa í mjúka dýnu inn á milli allra æfinganna sem gerðar var í harða dýnu. 

Á akademiuæfingum fáum við tækifæri til að einbeita okkur meira að smáatriðum heldur en á meistaraflokks æfingum.  Þarna gátum við brotið allt niður í minnstu búta og æft tæknina betur.  Þó mér hafi ekki fundist neitt rosalega gaman að æfa alla þessa tækni til að byrja með, þá nýttist hún mjög vel þegar átti að setja saman stökkið í heild sinni.  Tækniæfingarnar urðu þó með tímanum skemmtilegri, sérstaklega þegar maður fann mun á stóru stökkunum og fór að sjá framfarir.  Ég finn það einnig mjög vel að eftir að ég útskrifaðist frá akademíunni þá hefur tæknilegi hlutinn dalað aðeins. 

Akademiuæfingarnar voru alltaf skemmtilegar og alltaf tilhlökkunarefni.  Enda voru þarna komin saman frábærir krakkar og frábærir þjálfarar. Til að byrja með voru þetta einungis stelpur en svo komu 1 og 1 strákur og á síðustu önninni minni voru þeir 2.  Þetta voru einfaldlega skemmtilegustu tímarnir í skólanum og aldrei datt manni í hug að skrópa.  Þjálfararnir sem unnu með okkur yfir þennan tíma eiga miklar þakkir skildar og þá sérstakleg hún Olga mín, en hún var upphafsmaður, stoð okkar og stytta í gegnum súrt og sætt. Þessir tímar munu sitja eftir sem mjög góð minning þegar ég hugsa til baka í FSu, ásamt þó nokkrum öðrum skemmtilegum áföngum.