Fréttir

Vakinn er athygli á nýju og kraftmiklu námi í matvæla- og ferðagreinum í FSu. Um er að ræða heildstætt brautarnám með nýrri og öflugri aðstöðu í kennslueldhúsi skólans. Námið er 70 einingar og námstími tvær til þrjár annir. Það er ætlað þeim sem stefna að vinnu við ferðaþjónustu eða frekara námi í matvælagreinum eins og matreiðslu, matartækni, bakstri, framreiðslu og kjötiðn. Nemendur fá starfskynningu í ferða- og matvælagreinum á vinnustöðum og fara í vinnustaðanám 18 - 24 klst. á önn.

Í liðinni kjördæmaviku Alþingis fóru þingmenn í kjördæmi sín og sinntu hinum ýmsu erindum. Sóttu heim fyrirtæki og stofnanir, héldu fundi og hittu fólk og juku tengsl sín við kjósendur. Sex af tíu þingmönnum Suðurlands komu í heimsókn í FSu fimmtudaginn 5. október á alþjóðadegi kennara, þrjár konur og þrír karlmenn.

Síðastliðið vor setti Byggðasafn Árnesinga upp sýningu í Húsinu á Eyrarbakka sem nefnd var Drengurinn, fjöllin og Húsið þar sem fjallað er um æsku og unglingsár hins merka myndlistarmanns Ásgríms Jónssonar (1876 – 1958). Nú hefur þessi sama sýning verið sett upp í björtu og fallegu rými fyrir framan myndlistarstofu FSu á þriðju hæð skólans. Fullyrða má að um einstakt framtak og samvinnuverkefni sé að ræða á milli safns og skóla.

Þriðjudaginn 5. september lagði vaskur 24 manna nemendahópur ásamt þremur kennurum af stað með rútu að Skógum undir Eyjafjöllum með það markmið í farteskinu að ganga yfir Fimmvörðuháls. Gangan er verkefni áfangans ÍÞRÓ2JF02 sem kenndur er á hverri önn við FSu. Lagt var af stað frá Skógum, gengið meðfram Skógá og öllum þeim fjölmörgu fossum sem leynast í ánni. Frá brúnni yfir Skógá var komið í Baldvinsskála. Þaðan farið milli jökla yfir hinn eiginlega Fimmvörðuháls sem er í rúmlega 1000 metra hæð. Á þessum kafla sést vel hve jöklarnir hafa hopað og þar sem áður voru snjófannir eru nú komnir djúpir dalir og íshröngl.

Hluti af þjálfun nemenda í framhaldsáföngum í myndlist er að setja upp sýningu í opinberu sýningarrými utan skólans. Nú eru það nemendur í áfanganum Myndlist sem sjá að þessu sinni um kynningu á eigin verkum og voru verkin voru unnin á vorönn 2023.

Þessa dagana er tíminn hjá blómaskreytinganemum til að vinna haustskreytingar úr náttúrunni umhverfis Garðyrkjuskólann. Gleðin var við völd á 42 ára afmælisdegi FSu og alþjóðlegum degi súkkulaðis.

Átta kennarar frá tveimur erlendum skólum heimsóttu FSu í byrjun skólaársins og dvöldi hér í umsjá kennara FSu frá 24. til 28. ágúst. Annar skólinn er Lasnamae Gymnasium í Tallinn á Eistlandi og hinn er President Adamkaus Gymnasium í Kaunas í Litháen. Sameiginlegt verkefni þessarar heimsóknar nefnist á ensku Sustainable Community for Sustainable Schools eða sjálfbært samfélag fyrir sjálfbæra skóla og er á vegum Nordplus. Þetta er svokallað jobshadowing verkefni eða nokkurskonar skuggsjá þar sem skólabragur og allar aðstæður og aðbúnaður til kennslu er kannaður og borin saman.

Fróðlegur og vel skipulagður fundur fulltrúa KÍ var haldinn á sal FSu (Gaulverjabæ) þriðjudaginn 5. september. Hófst hann klukkan 16.30 og lauk á slaginu 18.00. Hugmyndin með fundinum er að kynna skólastefnu Kennarasambandsins, starfsemi þess og orlofs- og endurmenntunarsjóði. Er fundurinn haldinn í hringferð sambandsins um landið til að upplýsa félagsmenn og efla með þeim stéttarvitund og fagmennsku í starfi.

Við upphaf hvers skólaárs verða alltaf ákveðin mannaskipti í starfsliði FSu. Einir koma - þá aðrir fara eins og orðtakið segir enda er FSu fjölmennur og lifandi vinnustaður með um það bil eitt þúsund nemendur og starfsmenn.