Fréttir

Það er oft nóg að sýsla í trédeild FSu fyrir utan daglegt nám og störf. Öflug samskipti atvinnulífs og verknáms eru mikilvæg og felast meðal annars í stuðningi við tækjakaup og uppfærslu í öryggismálum. 17. október síðastliðinn var þar mikið um að vera þegar afhending vinnufatapakkans fór fram. Í leiðinni var haldið reisugildi á húsinu sem er í byggingu í porti verknámshússins IÐU. Fulltrúar frá BYKO, Snickers vinnufötum og Bosch verkfæra mættu og sáu um allar veitingar, hlaðborð í mat og drykk auk þess sem Bosch bíllinn mætti á svæðið troðfullur af verkfærum.

Nýlega bárust Garðyrkjuskólanum á Reykjum veglegar gjafir frá Sæmundi Guðmundssyni, eplabónda á Hellu. Sæmundur hefur um árabil verið einn ötulasti ræktandi ávaxtatrjáa á Íslandi. Nemendur Garðyrkjuskólans hafa ítrekað heimsótt Sæmund og fengið að skoða aldingarðinn við heimili hans á Hellu. Það er ótrúleg upplifun að ganga á milli ávaxtatrjánna og sjá hvernig þau þrífast hér á okkar erfiða ræktunarlandi. Nú á haustdögum gaf Sæmundur skólanum um fimmtíu eplatré sem eru góður grunnur að aldintrjáaræktun skólans í framtíðinni. Nemendur gróðursettu trén í stóra potta í verklegri æfingu í áfanga um ávaxtarækt nú á haustönninni. Búið er að koma þeim vel fyrir í garðskála skólans þar sem þau munu gleðja heimafólk og gesti í framtíðinni.

„Það er mjög mikilvægt að vera meðvitaður um umhverfisvernd, endurnýtingu og sjálfbærni. Gull getur til dæmis leynst í gamalli verðlausri flík eða í gleymdum efnisbút” segir Agnes Ósk Snorradóttir námsráðgjafi við FSu og hugmyndasmiður. Tilefni ummælanna var tískusýning sem nemendur í hársnyrtiiðn og áfanganum Hönnun & endurvinnsla héldu í Bragganum á Eyrarbakka fimmtudaginn 27. nóvember síðastliðinn. Hér var því um þverfaglega samvinnu að ræða milli kennslugreina þar sem þeir uppskáru afrakstur námsvinnu annarinnar.

Í byrjun nóvember kom Chanel Björk Sturludóttir í heimsókn í FSu en hún hefur getið sér gott orð fyrir umfjöllun sína í útvarpi og sjónvarpi um fjölmenningu og fordóma í íslensku samfélagi. Þáttagerð hennar bar nafnið MANNFLÓRAN og jafnhliða því heldur hún úti heimasíðu með sama heiti. Chanel býður upp á fræðsluerindi og ráðgjöf fyrir skóla og stofnanir sem vilja kynna sér birtingarmyndir fordóma og rasisma í þeim tilgangi að skapa jafnara og betra samfélagi.

Við Garðyrkjuskóla FSU hefur lengi verið draumur að rækta okkar eigið kakó til að geta gætt okkur á alíslensku súkkulaði. Upphafið að því að sá draumur rættist var þegar sáð var fyrir kakói árið 2013. Sú sáning bar þann árangur að eitt tré hefur vaxið og dafnað í Bananahúsinu síðastliðin 10 ár. En nú í sumar bar tréð loksins ávöxt og eitt aldin náði að þroskast. Það var síðan uppskorið með viðhöfn nú á haustdögum.

Þriðjudaginn 17. október síðastliðinn hélt hugrakkur hópur jarðfræðinema í FSu í námsferð á Reykjanesskaga þar sem jörð skelfur þessa dagana og eldar geta gosið. Ferðin var að frumkvæði og í umsjón Heklu Þallar Stefánsdóttur kennara og tilgangur hennar að fræðast um hin ýmsu jarðfræðilegu fyrirbæri Reykjanesskaga.

Nemendur blómaskreytingabrautar við FSu á Reykjum í Ölfusi fóru nýlega ásamt kennurum sínum til borgarinnar Manchester á Englandi að taka þátt í heimsmeistarakeppni í blómaskreytingum. En heimsmeistaramótið INTERFLORA er stærsti alþjóðlegi viðburður í heimi blómaskreytinga. Mótið hefur verið haldið á nokkurra ára fresti víðs vegar um heiminn allt frá árinu 1972. Fulltrúar frá tuttugu löndum unnu fjölmörg verkefni í þrjá daga til þess að skera úr um hver væri sigurvegari. Úrslitakeppnin fór fram fyrir framan 600 áhorfendur og var gríðarlega spennandi. Þessi ferð var mikil upplifun fyrir bæði verðandi og starfandi blómaskreyta. Núna er stefnan tekin á þátttöku Íslands í næstu keppni.

Árlegur samráðsfundur kennara FSu með grunnskólakennurum á Suðurlandi var haldinn í Odda, aðalbyggingu FSu þann 1. nóvember. Í byrjun fundarins ávarpaði skólameistari Olga Lísa Garðarsdóttir þátttakendur og lagði áherslu á snertipunktinn milli skólastiganna og mikilvægi þess að kennarar ræddu sín á milli og væru upplýstir um megináherslur í námi nemenda á hvoru skólastigi. Samráðið snýr að kjarnagreinunum fjórum, dönsku, ensku, íslensku og stærðfræði. Bæði var góðmennt og fjölmennt á fundinum enda er umráðasvæði FSu eitt víðfeðmasta skólasvæði á Íslandi með Þorlákshöfn í vestri og Kirkjubæjarklaustur í austri.

Um miðjan októbermánuð fóru 6 garðyrkjunemar ásamt kennara í námsferð til Litháen á vegum Nordplus verkefnisins Nordic horticulture. Verkefnið er samstarf 5 garðyrkjuskóla í Skandinavíu og Eistrasaltslöndunum sem hefur það markmið að auka þekkingu og færni þátttakenda ásamt því að efla samstarf kennara þessara skóla. Verkefni námsferðarinnar til Joniskis í Litháen var að fræðast um staðargróður, samplantanir, sameldi, ræktun vínberja og mótun runna og trjáa í uppeldi. Einnig er mikilvægur hluti verkefna af þessu tagi að kynnast menningu þess lands sem er sótt heim og styrkja félagsleg bönd nemenda frá öllum þátttökulöndum. 

Nú á haustdögum héldu nemendur blómaskreytingabrautar Garðyrkjuskólans í ferðalag ásamt kennurum sínum til Manchester á heimsmeistaramótið í blómaskreytingum. Keppnin stóð í 3 daga og var stórkostleg upplifun fyrir íslensku gestina að fylgjast með störfum fólks víðs vegar úr heiminum. Þetta er ómetanleg reynsla fyrir nemendur að sjá og upplifa það besta sem verið er að gera í þeirra fagi.